ဦးကုလားမှန်နန်းရာဇ၀င်မှ ကောက်နှုတ်ချက်
ကောဇာသက္ကရာဇ်(၆၄၈)ခုနှစ်တွင် ကျော်စွာဘုရင်နန်းတက်သည်။ ကျော်စွာဘုရင်နန်းတက်သောအခါ စောစိုးကို မိဘုရားမြှောက်ခဲ့သည်။ ၄င်းတို့တွင် သားတော်(၂)ပါးနှင့် သမီးတော်(၃)ပါးရှိသည်။ ၄င်းတို့မှာ သားတော်များဖြစ်ကြသော သားတော်ကြီး စောနစ်နှင့် သားတော်ငယ် မင်းရှင်စောတို့ဖြစ်ပြီး သမီးတော်များမှာ ပင်းယစားခုနှစ်လျောင်းဒါယိကာ ဥဇနာမိဘုရားစောရ ၊ သင်္ခယာစောယွမ်းနှင့် စောနှောင်းတို့ ဖြစ်ကြသည်။
ကျော်စွာဘုရင်သည် သားတော်ကြီးစောနစ်ကို ကောဇာသက္ကရာဇ်(၆၆၀)တွင် သီရိတြိဘ၀နာဒိတျာပ၀ရာဓမ္မရာဇာ ဟူသောအမည်ဖြင့် ပုဂံမြို့တွင် မင်းပြုစေတော်မူ၏။ သားတော်အငယ် မင်းရှင်စောကို သရက်မြို့ စားပေးတော်မူသည်။ မင်းရှင်စောသည် သိင်္ခဗိုလ်၏သမီး ရှင်မြတ်လှအား မိဘုရားမြှောက်ခဲ့သည်။
ကောဇာသက္ကရာဇ်(၆၆၀)တွင် ကျော်စွာမင်း မြင်းစိုင်းအရပ်သို့ ကြွရောက်တော်မူစဉ် သိင်္ခဗိုလ်၏သား မင်းညီနောင်(၃)ပါးဖြစ်သော အသင်္ခယာ၊ ရာဇသင်္ကြန်နှင့် သီဟသူတို့မှ ဖမ်း၍ ခေါင်းရိတ်သင်္ကန်းလဲစေပြီး အစောင့်အရှောက်ဖြင့် နန်းချ၍ ၄င်းအရပ်၌ ထားလေသည်။
ကောဇာသက္ကရာဇ်(၆၆၂)တွင် တရုတ်ပြည် ဦးတည်ဘွား၏ စေခိုင်းချက်အရ တရုတ်စစ်သည်များ မြင်းစိုင်းမြို့ကို နှောက်ယှက်သောကြောင့် မင်းရှင်စောသည် သရက်မြို့ကို ဓါးမ(၃၀၀) ၊ ပေါက်တူး(၃၀၀) ၊ ပုဆိန်(၃၀၀)ဖြင့် ခံတပ်တည်ခဲ့လေသည်။
သိင်္ခဗိုလ်သား မြင်းစိုင်းညီနောင်(၃)ဦးတို့ ကျော်စွာမင်းကို နန်းချသည်ကြားသော် ရခိုင်မင်းက သရက်မြို့ကို လုပ်ကြံရာ သရက်မြို့ပျက်လျက် မင်းရှင်စောကို သားမယားနှင့်တကွ ရခိုင်ပြည်သို့ ခေါ်ယူလေသည်။ ရခိုင်ပြည်၌ မင်းရှင်စောသည် သားတော်များကို ပညာရှိများထံအပ်၍ ပညာများသင်ကြားစေခဲ့သည်။ မင်းရှင်စော၏သားတော်(၃)ပါးမှာ သားတော်ကြီး မြင်းစိုင်းရွှေနန်းရှင် ၊ သားတော်အလတ် ပြည်မင်းစောရနောင် ၊ သားတော်အငယ် မင်းကြီးစွာစော်ကဲ တို့ဖြစ်သည်။
မင်းရှင်စော ရခိုင်ပြည်မှ ထွက်ခွာပြီး စစ်ကိုင်းပင်းယသို့ သွားရောက်ခဲ့လေသော် စစ်ကိုင်းမင်းဆင်ဖြူရှင်ထံတွင် သားတော်ကြီးကား ပင်းယဥဇနာတွင်မြဲ၍ ဥဇနာမရှိသည့်နောက် ငါးစီးရှင်ကျော်စွာတွင်မှ စောရနောင်ဟူသော အမည်ဖြင့် ပြည်မြို့ကို စားရသည်။ ညီတော်အငယ်စော်ကဲကား စစ်ကိုင်းမင်း ဆင်ဖြူရှင်ထံတွင်မြဲ၍ အမြစ်မြို့ကိုစားရ၏။
ကောဇာသက္ကရာဇ်(၇၂၉)တွင် အင်းဝဘုရင်သတိုးမင်းဖျားအနိစ္စရောက်၍ မင်းပြုရန်အတွက် စော်ကဲအား မင်းမြှောက်ကြလေသည်။ သို့မှစ၍ မင်းကြီးစွာစောကဲ ဟု တွင်လေသည်။
မင်းရှင်စောသည် သားတော်(၃)ပါး အထွတ်အထိပ်သို့ရောက်မှ မိမိယခင်ပိုင်စားခဲ့သော သရက်မြို့သို့ စုန်ဆင်းလာရာ ပုဂံမြို့ အာနန္ဒာမြတ်စွာဘုရားကိုဖူးပြီး သရက်မြို့သို့ရောက်လျှင် ငါတို့သည် ရခိုင်မင်းလက်သို့ရောက်ပြီးမှ အသက်ဘေးလွတ်လာခဲ့သည်ဟု ပုဂံအာနန္ဒာဘုရားပုံတော်ကို အမှီပြုပြီး သရက်မြို့၌ သက်လွတ်ဘုရားဟု အမည်ပေး တည်ထားကိုးကွယ်တော်မူလေသည်။ နောက်မှ ရွှေသက်လွတ်ဘုရားဟု တွင်သည်။
ရွှေသက်လွတ်ဘုရားကြီးတွင် ကုလားကျောင်းခံ၍ ကုလားကျောင်းအထက်၌ စေတီတည်ထားကိုးကွယ်တော်မူရာ ကုလားကျောင်း၌ မုခ်လေးမုခ်အနက် အနောက်မုခ်ကို ချန်လှပ်ပြီး မြောက်ဘက်၌ ကောက္ကသံဂုဏ် မြတ်စွာဘုရား ၊ တောင်ဘက်မုခ်၌ ဂေါဏဂုဏ်မြတ်စွာဘုရား ၊ အရှေ့ဘက်မုခ်၌ ကဿပမြတ်စွာဘုရားနှင့် အနောက်ဘက်မုခ်၌ ဂေါတမမြတ်စွာဘုရားထားသင့်လျက် ၄င်းနေရာတွင် မယ်တော်မိဘုရားစောစိုး၏ ပုံတော်ကို တည်ထား၍ ကုလားကျောင်းအထက် စေတီတော်အရှေ့မျက်နှာမုခ်တွင် ဂေါတမမြတ်စွာဘုရားပုံတော်ကို တည်ထားကိုးကွယ်ခဲ့သည်။
နောက်မှ ရှေ့ကုသိုလ်ကံအကြောင်းအရင်းကောင်းသောကြောင့် မိမိတို့မြို့ပြန်၍ ရောက်ပေသည်ဟု ရှေးယင်းခေါင်းဘုရားတစ်ဆူ တည်ထားကိုးကွယ်ခဲ့သည်။ နောက်မှ ရွှေရင်ခေါင်းဘုရားဟု တွင်ခဲ့သည်။
သရက်မြို့ ရွှေသက်လွတ်စေတီတော်မြတ်ကြီး တည်ထားကိုးကွယ်ခဲ့သော သက္ကရာဇ်မှာ မင်းကြီးစွာစော်ကဲ နန်းတက်သောနှစ် သက္ကရာဇ်(၇၂၉)နှစ် ဖြစ်သည်။
0 comments:
Post a Comment